ഗവര്ണര് ആരിഫ് മുഹമ്മദ് ഖാന് എതിരെ രൂക്ഷവിമര്ശനവുമായി സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്. മോദി സര്ക്കാരിന്റെ രാഷ്ട്രീയനയത്തെ അനുകൂലിക്കുന്നവരും പ്രതികൂലിക്കുന്നവരുമെന്ന ചേരിതിരിവാണ് ഇവിടെ ഉള്ളതെന്ന് അദ്ദേഹം പറഞ്ഞു.
ജനങ്ങളുടെ കണ്ണില് പൊടിയിട്ട് കമ്യൂണിസ്റ്റുവിരുദ്ധ ജ്വരം പടര്ത്തുകയാണ് ഗവര്ണര് ചെയ്യുന്നത്. ഇവിടെ ഗവര്ണറും മുഖ്യമന്ത്രിയോ അല്ലെങ്കില് ഏതെങ്കിലും മന്ത്രിമാരോ തമ്മിലുള്ള വ്യക്തിപരമായ പ്രശ്നങ്ങളല്ല ഉള്ളത്. മോദി സര്ക്കാരിന്റെ ചട്ടുകമായ ഗവര്ണറും മതനിരപേക്ഷതയില് ഉറച്ചുനില്ക്കുന്ന എല്ഡിഎഫ് സര്ക്കാരും തമ്മിലുള്ള ഭിന്നതയാണ് കാതലായ വസ്തുത.
ഗവര്ണര്ക്ക് ചൂട്ടുപിടിക്കുകയാണ് കോണ്ഗ്രസ് പ്രതിപക്ഷമെങ്കിലും ഗവര്ണര് – സര്ക്കാര് ഏറ്റുമുട്ടലിന്റെ രാഷ്ട്രീയം ജനങ്ങള് തിരിച്ചറിയും. ഗവര്ണറുടെ വളയമില്ലാ ചാട്ടത്തിന്റെ രാഷ്ട്രീയവും നിലവാരവും എന്തെന്ന് വ്യക്തമാക്കുന്നതാണ് കണ്ണൂര് വൈസ്ചാന്സലര്ക്കെതിരായ ആക്രോശവും ചുവടുവയ്പുമെന്നും കോടിയേരി ദേശാഭിമാനിയില് എഴുതിയ ലേഖനത്തില് പറയുന്നു.
മോദി ഭരണത്തില് കമാന്ഡര് ഇന് ചീഫ് ആകാനുള്ള ശ്രമത്തിലാണ് ആരിഫ് മുഹമ്മദ് ഖാന്. കമ്മ്യൂണിസ്റ്റ് വിരുദ്ധ ജ്വരം പടര്ത്തുകയാണ്. സംഘപരിവാര് അജണ്ടയുടെ ഭാഗമാണ് ഗവര്ണര് ഉണ്ടാക്കുന്ന പ്രശ്നങ്ങളെന്നും കോടിയേരി വിമര്ശിച്ചു.
