ദേശീയ ചലച്ചിത്ര പുരസ്കാര വിവാദത്തില് പ്രതികരണവുമായി അവാര്ഡ് ജേതാവ് നഞ്ചമ്മ. ദേശീയ പുരസ്കാര വിവാദം കാര്യമാക്കുന്നില്ല. വിമര്ശനം മക്കള് പറയുന്നതു പോലെയെ കണക്കാക്കുന്നുള്ളു. ആരോടും വിരോധമില്ലെന്നും നഞ്ചിയമ്മ പറഞ്ഞു.
‘വനവാസികളുടെ പാട്ടിനെ കുറിച്ച് ഒന്നും അറിയാത്തവരാണ് വിമര്ശിക്കുന്നത്. ഞങ്ങള് പാടുന്നത് എന്താണെന്ന് മനസിലാക്കുന്നവരും ചിന്തിക്കുന്നവരും വിമര്ശിക്കില്ല. വിമര്ശനത്തിന് പിന്നില് അസൂയയുമുണ്ടെന്നും’ നഞ്ചിയമ്മ പറഞ്ഞു.
ചെറുപ്പം മുതല് പാടുന്നുണ്ട്. പാട്ടിനായി ഒന്നും ഉപേക്ഷിക്കാറില്ല. ആവശ്യമായ ഭക്ഷണങ്ങള് കഴിച്ചാണ് പാട്ടുപാടുന്നത്. പരമ്പരാഗതമായി പാട്ട് കൈമാറി വരുന്നു. എല്ലാ സംഗീതവും ശുദ്ധമാണെന്ന് നഞ്ചിയമ്മ കൂട്ടിച്ചേര്ത്തു.
അയ്യപ്പനും കോശിയിലെയും ആലാപനത്തിനാണ് നഞ്ചമ്മയെ മികച്ച ഗായികയായി തെരഞ്ഞെടുത്തത്. ഇതിന് പിന്നാലെ വിമര്ശനവുമായി സംഗീതജ്ഞന് ലിനു ലാല് രംഗത്തെത്തിയിരുന്നു. നഞ്ചമ്മ പാടിയ ഗാനം ആണോ കഴിഞ്ഞ വര്ഷത്തെ ഏറ്റവും മികച്ച ഗാനമെന്ന് ലിനു ചോദിച്ചിരുന്നു. ഒരുമാസം സമയം കൊടുത്താല് പോലും സാധാരണ ഒരു ഗാനം നഞ്ചമ്മയ്ക്ക് പാടാന് കഴിയില്ലെന്നും സംഗീതത്തിന് വേണ്ടി ജീവിതം ഉഴിഞ്ഞുവച്ചവര്ക്ക് ഈ അംഗീകാരം അപമാനമായി തോന്നില്ലേയെന്നും ലിനു ലാല് ചോദിച്ചു. ഇതേ തുടര്ന്ന് സാമൂഹിക മാധ്യമങ്ങളില് നഞ്ചമ്മയെ അനുകൂലിച്ചും പ്രതികൂലിച്ചും നിരവധി പേര് പ്രതികരണങ്ങളുമായി എത്തിയിരുന്നു.
