പ്രധാന മന്ത്രി നരേന്ദ്ര മോദിക്കെതിരെ ഗുജറാത്തിൽ പോസ്റ്റർ. മോദി ഹഠാവോ ദേശ് ബച്ചാവോ’ എന്നെഴുതിയ പോസ്റ്ററുകൾ അഹമ്മദാബാദ് നഗരത്തിന്റെ വിവിധ ഭാഗങ്ങളിലാണ് പ്രത്യക്ഷപ്പെട്ടത്. അതേ സമയം പോസ്റ്റർ പതിച്ച എട്ട് പേരെ അറസ്റ്റ് ചെയ്തിട്ടുണ്ട്.
ആം ആദ്മി പാർട്ടി നരേന്ദ്ര മോദിക്കെതിരെ രാജ്യ വ്യാപകമായി പോസ്റ്റർപ്രചരണം ആരംഭിച്ചതിന് തൊട്ടു പിന്നാലെ ആണ് അറസ്റ്റ്.
സംഭവത്തിൽ കേസെടുത്തിട്ടുണ്ടെന്നും കൂടുതൽ അന്വേഷണം നടന്നുവരികയാണെന്നും അഹമ്മദാബാദ് പൊലീസിനെ ഉദ്ധരിച്ച് വാർത്താ ഏജൻസിയായ എഎൻഐ റിപ്പോർട്ട് ചെയ്തു.
എഎപിയുടെ “മോദി ഹഠാവോ, ദേശ് ബച്ചാവോ” കാമ്പയിൻ രാജ്യത്തുടനീളം 11 ഭാഷകളിലാണ് ആരംഭിച്ചിരിക്കുന്നത്. ഇംഗ്ലീഷ്, ഹിന്ദി, ഉറുദു എന്നീ ഭാഷകൾക്ക് പുറമെ ഗുജറാത്തി, പഞ്ചാബി, തെലുങ്ക്, ബംഗാളി, ഒറിയ, കന്നഡ, മലയാളം, മറാത്തി എന്നീ ഭാഷകളിലും പോസ്റ്ററുകൾ പുറത്തിറക്കിയിട്ടുണ്ട്.
