കാസര്കോട്: കാസര്കോട് കുണ്ടംകുഴി സ്കൂളില് പത്താം ക്ലാസുകാരനെ കരണത്തടിച്ച് കര്ണ്ണപടം പൊട്ടിച്ച സംഭവത്തില് പൊലീസ് കേസെടുത്തു. ജാമ്യമില്ല വകുപ്പ് പ്രകാരമാണ് കേസെടുത്തത്. ഹെഡ്മാസ്റ്റര് എം അശോകനെതിരെ ബിഎന്എസ് 126(2), 115(2), എന്നീ വകുപ്പുകള് ചേര്ത്താണ് കേസ് രജിസ്ട്രര് ബേഡകം പൊലീസാണ് കേസെടുത്തത്. ബാലാവകാശ കമ്മീഷന് ഇന്ന് കുട്ടിയുടെ വീട്ടിലെത്തി തെളിവെടുക്കും.
സംഭവത്തില് ജില്ലാ വിദ്യാഭ്യാസ ഉപ ഡയറക്ടര് ഇന്നലെ റിപ്പോര്ട്ട് സമര്പ്പിച്ചു. പൊതു വിദ്യാഭ്യാസ ഡയറക്ടര്ക്കാണ് റിപ്പോര്ട്ട് സമര്പ്പിച്ചത്. അന്വേഷണത്തിന്റെ ഭാഗമായി വിദ്യാഭ്യാസ വകുപ്പ് ഡെപ്യൂട്ടി ഡയറക്ടര് വി മധുസൂദനന് ഇന്നലെ കുണ്ടംകുഴി സ്കൂളിലെത്തി ഹെഡ്മാസ്റ്റര് എം അശോകന്റെയും പരിക്കേറ്റ വിദ്യാര്ത്ഥിയുടെയും മൊഴി രേഖപ്പെടുത്തിയിരുന്നു. റിപ്പോര്ട്ടിന്റെ അടിസ്ഥാനത്തില് ഹെഡ്മാസ്റ്റര് എം അശോകനെതിരെ നടപടിയുണ്ടായേക്കും. സംഭവത്തില് ബാലാവകാശ കമ്മീഷന് സ്വമേധയാ കേസെടുത്തിട്ടുണ്ട്.
കഴിഞ്ഞ തിങ്കളാഴ്ചയാണ് കുണ്ടംകുഴി ജിഎച്ച്എസ്എസിലെ അസംബ്ലിക്കിടെ പത്താം ക്ലാസുകാരനെ ഹെഡ്മാസ്റ്റര് അടിച്ച് കര്ണ്ണപടം പൊട്ടിച്ചത്.
