അബുദാബിയില് രണ്ടിടങ്ങളിലുണ്ടായ സ്ഫോടനത്തില് മൂന്ന് പേര്കൊല്ലപ്പെടുകയും ആറു പേര്ക്ക് പരിക്കേൽക്കുകയും ചെയ്തു. . അധികൃതര് നല്കുന്ന വിവരമനുസരിച്ച് രണ്ട് ഇന്ത്യക്കാരും ഒരു പാകിസ്താന് സ്വദേശിയുമാണ് മരിച്ചത് . മരിച്ചവരുടെ പേര് വിവരങ്ങള് ലഭ്യമായിട്ടില്ല.
ആദ്യ പൊട്ടിത്തെറി ഉണ്ടായത് യുഎഇയുടെ ഏറ്റവും വലിയ എണ്ണക്കമ്പനിയായ അഡ്നോക്കിന്റെ മുസഫയിലെ സംഭരണ കേന്ദ്രത്തിനു സമീപമാണ് . സ്ഫോടനത്തില് മൂന്ന് ഇന്ധന ടാങ്കറുകള് പൊട്ടിത്തെറിച്ചു. പിന്നീട് അബുദാബി വിമാനത്താവളത്തിന് സമീപത്ത് നിര്മാണം നടക്കുന്ന മേഖലയിലും പൊട്ടിത്തെറിയുണ്ടായി. രണ്ടിടങ്ങളിലും പൊട്ടിത്തെറിക്ക് മുന്പ് ഡ്രോണ് പോലെയുള്ള വസ്തു വന്നുപതിച്ചു എന്ന് അബുദാബി പോലീസ് സ്ഥിരീകരിച്ചു. ആശങ്കപ്പെടേണ്ട സാഹചര്യമില്ലെന്നും സ്ഥിതിഗതികള് നിയന്ത്രണ വിധേയമാണ് എന്നും പോലീസ് അറിയിച്ചു.
അതേസമയം, യുഎഇയിലെ പൊട്ടിത്തെറി തങ്ങളുടെ സൈനിക നടപടിയായിരുന്നു എന്ന് യെമനിലെ ഹൂതി വിമതര് അവകാശപ്പെട്ടു. ഹൂതികള് നേരത്തെ പതലവണകളായി സൗദി അറേബ്യയിലെ നജ്റാനിലെക്കും അബഹാ വിമാനത്താവളത്തിലേക്കും ഡ്രോണ് ആക്രമണം നടത്തിയിട്ടുണ്ട്. ചെങ്കടലില് ജി സി സി രാജ്യങ്ങളുടെ കപ്പലുകള് പല തവണ ഹൂത്തികള് അക്രമിച്ചിട്ടുണ്ട്.
