കാസർകോട്: ലോറിയും ബൈക്കും കൂട്ടിയിടിച്ച് കോളേജ് വിദ്യാർത്ഥി മരിച്ചു. കുമ്പള മഹാത്മാ കോളേജ് വിദ്യാർത്ഥി ആദിൽ (22) ആണ് മരിച്ചത്. ആദിലിനൊപ്പം ബൈക്കിലുണ്ടായിരുന്ന സന്നത്തടുക്ക സ്വദേശി അർഷാദ് അലി(18) ഗുരുതര പരിക്കുകളോടെ മംഗളൂരുവിലെ സ്വകാര്യ ആശുപത്രിയിൽ പ്രവേശിപ്പിച്ചു. ചൊവ്വാഴ്ച ഉച്ചയ്ക്ക് രണ്ടുമണിയോടെ ഹൊസങ്കടി ദേശീയപാതയിലാണ് അപകടം.
കോളേജില് നിന്ന് പരീക്ഷ കഴിഞ്ഞ് മടങ്ങുന്നതിനിടെ ദേശീയപാത നിര്മ്മാണ ജോലിയിലായിരുന്ന ടിപ്പര് ലോറിയുമായി ഇവര് സഞ്ചരിച്ച ബൈക്ക് ഇടിക്കുകയായിരുന്നു. ആദിൽ അപകട സ്ഥലത്ത് വച്ച് തന്നെ മരണപ്പെട്ടു. ഒപ്പം സഞ്ചരിച്ചിരുന്ന അർഷാദ് അലിയുടെ തലയ്ക്കാണ് ഗുരുതര പരിക്ക്. ഓടിക്കൂടി ആളുകൾ ഉടൻതന്നെ വിദ്യാർത്ഥിയെ മംഗളൂരുവിലെ ആശുപത്രിയിലേക്ക് മാറ്റി.
ആദിലിന്റെ മൃതദേഹം പോസ്റ്റ്മോർട്ടത്തിനായി കാസർകോട് ജനറൽ ആശുപത്രിയിലേക്ക് കൊണ്ടുപോയി. അപകടത്തിൽ ബൈക്ക് പൂർണമായും തകർന്നിരുന്നു. അപകടത്തെ തുടർന്ന് ദേശീയപാതയിൽ ഒരു മണിക്കൂറോളം ഗതാഗതം സ്തംഭിച്ചു. കുമ്പള പോലീസ് എത്തി ഗതാഗതം പുനഃസ്ഥാപിച്ചു. അപകടം വരുത്തിവെച്ച ടിപ്പർ ലോറി പോലീസ് കസ്റ്റഡിയിലെടുത്തു. കുഞ്ചത്തൂർ ഗവൺമെന്റ് ഹൈസ്കൂളിന് സമീപത്തെ എം അസ്മയുടെ മകനാണ് ആദിൽ.
