പത്തനംതിട്ട: കോന്നിയില്‍ കടുവയെ ചത്തനിലയില്‍ കണ്ടെത്തി. കുമ്മണ്ണൂര്‍ കാഞ്ഞിരപ്പാറയിലെ വനത്തിലാണ് കടുവയുടെ ജഡം കണ്ടെത്തിയത്. വനം വകുപ്പ് ഉദ്യോഗസ്ഥര്‍ സ്ഥലത്തെത്തി. എങ്ങനെയാണ് ചത്തതെന്ന് കണ്ടെത്താന്‍ ജഡം പോസ്റ്റുമോര്‍ട്ടം നടത്തും.
ആഴ്ചകള്‍ക്ക് മുന്‍പ് അച്ചന്‍കോവിലാറ്റില്‍ കല്ലേലിക്കടവില്‍ കടുവയുടെ കുട്ടിയുടെ ജഡം കണ്ടെത്തിയിരുന്നു. കോന്നി വനം റേഞ്ചിലെ വനമേഖലയോട് ചേര്‍ന്ന കല്ലേലി ജനവാസ മേഖലയുടെ സമീപത്തെ സൗത്ത് കുമരംപേരൂര്‍ ഫോറസ്റ്റ് സ്റ്റേഷന്‍ പരിധിയിലാണ് ജഡം കണ്ടെത്തിയത്. ഒരു വയസുള്ള ആണ്‍ കടുവയാണ് ചത്തത്. നാല് ദിവസത്തെ പഴക്കമുള്ള ജഡം ആറ്റിലൂടെ ഒഴുകി വന്ന് നദിയിലെ മണ്‍തിട്ടയില്‍ തങ്ങിനിന്ന നിലയിലായിരുന്നു.
വനംവകുപ്പ് വെറ്ററിനറി ഓഫിസര്‍ ഡോ. ബി.ജി.സിബി, മൃഗസംരക്ഷണ വകുപ്പിലെ വെറ്ററിനറി സര്‍ജന്‍ ഡോ. ആനന്ദ് ആര്‍.കൃഷ്ണന്‍ എന്നിവരുടെ നേതൃത്വത്തില്‍ കുമ്മണ്ണൂര്‍ ഫോറസ്റ്റ് സ്റ്റേഷനില്‍ പോസ്റ്റ്‌മോര്‍ട്ടം നടത്തിയ ശേഷം ജഡം മറവുചെയ്തു.
