അമേരിക്കയില്‍ അറുപതാമത് പ്രസിഡന്റ് തെരഞ്ഞെടുപ്പ് നവംബര്‍ അഞ്ചിന് നടക്കും. നിലവിലെ വൈസ് പ്രസിഡന്റും ഡെമോക്രാറ്റിക് പാര്‍ടി നേതാവുമായ കമല ഹാരിസും മുന്‍ പ്രസിഡന്റും റിപ്പബ്ലിക്കന്‍ പാര്‍ടി നേതാവുമായ ഡോണള്‍ഡ് ട്രംപും തമ്മിലാണ് പ്രധാന മത്സരം.
വാക്‌പോരുകള്‍ അരങ്ങ് തകര്‍ക്കുന്ന യുഎസ് പ്രസിഡന്റ് തിരഞ്ഞെടുപ്പിന്റെ ലാസ്റ്റ് ലാപ്പില്‍ സ്ഥാനാര്‍ഥികള്‍ക്കായി വോട്ടു ചോദിച്ച് താരങ്ങളും. വാഗ്ദാനപ്പെരുമഴ നല്‍കിപ്പായുന്ന ഡോണള്‍ഡ് ട്രംപിനും കമല ഹാരിസിനും വേണ്ടി വോട്ട് ചോദിക്കുന്നവരില്‍ ടെയ്‌ലര്‍ സ്വിഫ്റ്റ് മുതല്‍ ഇലോണ്‍ മസ്‌ക് വരെയുണ്ട്.
വൈറ്റ് ഹൗസിന്റെ അടുത്ത അധിപര്‍ ആരെന്ന് അറിയാന്‍ കാത്തിരിക്കുകയാണ് ലോകം. യുഎസ് പ്രസിഡന്റ് തിരഞ്ഞെടുപ്പ് ക്ലൈമാക്‌സിലേക്കടുമ്പോള്‍ സ്ഥാനാര്‍ഥികള്‍ക്കായി വോട്ടുതേടുന്ന തിരക്കിലാണ് ഹോളിവുഡ് സെലിബ്രിറ്റികളും. പ്രധാന സ്ഥാനാര്‍ഥികളായ റിപ്പബ്ലിക്കന്റെ ഡോണള്‍ഡ് ട്രംപിനും ഡെമോക്രാറ്റ്‌സിന്റെ കമല ഹാരിസിനും വേണ്ടി നിരവധി പേരാണ് പിന്തുണ അറിയിച്ച് രംഗത്തെത്തിയിരിക്കുന്നത്.
