ആദ്യം മുതല്‍ ഫലസൂചനകള്‍ മാറിമറിഞ്ഞ തിരുവനന്തപുരത്ത് അവസാനം ശശി തരൂരിന്റെ കുതിപ്പ്. ലീഡ് വര്‍ധിപ്പിച്ച തരൂര്‍ ഇപ്പോള്‍ പതിനായിരത്തിലേറെ വോട്ടിന് മുന്നിലാണ്. 23000 ത്തിലേറെ വോട്ടിന് മുന്നേറിയ രാജീവ് ചന്ദ്രശേഖറിനെ തീരദേശ വോട്ടിന്റെ കരുത്തിലാണ് തരൂര്‍ പിന്നിലാക്കിയത്.നിലവില്‍ തരൂര്‍ 13666 വോട്ടിനാണ് മുന്നിട്ടുനില്‍ക്കുന്നത്.എല്‍ ഡി എഫ് സ്ഥാനാര്‍ത്ഥി പന്ന്യന്‍ രവീന്ദ്രന് ഒരു ഘട്ടത്തില്‍ രണ്ടാം സ്ഥാനത്ത് എത്താന്‍ കഴിഞ്ഞത് ഒഴിച്ചാല്‍ ശശി തരൂരും രാജീവ് ചന്ദ്രശേഖറും തമ്മിലാണ് മത്സരം നടക്കുന്നത്.
പോസ്റ്റല്‍ വോട്ടുകള്‍ എണ്ണിയപ്പോള്‍ ബിജെപി സ്ഥാനാര്‍ത്ഥി രാജീവ് ചന്ദ്രശേഖറിന് മുന്നിലെത്താന്‍ സാധിച്ചിരുന്നു. എന്നാല്‍, ഇവിഎമ്മിലെ വോട്ട് എണ്ണി തുടങ്ങിയപ്പോള്‍ ശശി തരൂര്‍ മുന്നിലേക്ക് പോയി. പക്ഷേ, ലീഡ് നില കുത്തനെ ഉയര്‍ത്താന്‍ ശശി തരൂരിന് ആദ്യഘട്ടത്തില്‍ സാധിച്ചില്ല. പിന്നീട് രാജീവ് ചന്ദ്രശേഖറിന്റെ മുന്നേറ്റമാണ് കണ്ടത്. 23000 വരെ ലീഡ് ഉയര്‍ത്താന്‍ രാജീവ് ചന്ദ്രശേഖറിന് കഴിഞ്ഞിരുന്നു. എന്നാല്‍ അവസാന റൗണ്ടിലെത്തിയപ്പോള്‍ തരൂര്‍ കുതിച്ചെത്തി ലീഡ് പിടിച്ചെടുക്കുകയായിരുന്നു.
