തിരുവനന്തപുരം: ആര്ച്ച് ബിഷപ്പ് മാര് ജോര്ജ് കൂവക്കാട് കര്ദ്ദിനാള് പദവിയിലേക്ക് ഉയര്ത്തപ്പെടുന്ന ചടങ്ങ് ഇന്ന് വത്തിക്കാനില്. കര്ദ്ദിനാള് പദവിയിലേക്ക് നേരിട്ട് ഉയര്ത്തപ്പെടുന്ന ആദ്യ ഇന്ത്യന് വൈദികനെന്ന പെരുമയും അദ്ദേഹത്തിനു സ്വന്തമാകും. ഇന്ന് ഇന്ത്യന് സമയം രാത്രി 8.30 മുതലാണ് സ്ഥാനാരോഹണ ചടങ്ങുകള്.
വത്തിക്കാനിലെ സെന്റ് പീറ്റേഴ്സ് ബസിലിക്കയിലാണ് ചടങ്ങുകള്. ഫ്രാന്സിസ് മാര്പാപ്പ മുഖ്യ കാര്മികത്വം വഹിക്കും. ഇദ്ദേഹത്തിനൊപ്പം മറ്റ് 20 പേരേയും കര്ദ്ദിനാള് പദവിയിലേക്ക് ഉയര്ത്തും.
ചടങ്ങുകള്ക്ക് പിന്നാലെ ഇന്ത്യന് സമയം രാത്രി 10 മുതല് 12 വരെ നവ കര്ദ്ദിനാള്മാര് ഫ്രാന്സിസ് മാര്പാപ്പയെ വത്തിക്കാന് കൊട്ടാരത്തില് സന്ദര്ശിച്ച് ആശിര്വാദം വാങ്ങും. നാളെ ഇന്ത്യന് സമയം ഉച്ചയ്ക്ക് 2 മുതല് പുതിയ കര്ദ്ദിനാള്മാര് ഫ്രാന്സിസ് മാര്പാപ്പയ്ക്കൊപ്പം സെന്റ് പീറ്റേഴ്സ് ബസിലിക്കയില് കുര്ബാന അര്പ്പിക്കും.
ചടങ്ങുകള്ക്ക് സാക്ഷ്യം വഹിക്കാന് ഇന്ത്യയെ പ്രതിനിധീകരിച്ച് ഏഴംഗ സംഘം പങ്കെടുക്കും. കേന്ദ്ര സഹ മന്ത്രി ജോര്ജ് കുര്യന്, മുന് കേന്ദ്ര മന്ത്രി രാജീവ് ചന്ദ്രശേഖര്, കൊടിക്കുന്നില് സുരേഷ് എംപി, അനില് ആന്റണി, അനൂപ് ആന്റണി, ടോം വടക്കന് അടക്കമുള്ളവരാണ് ഇന്ത്യയെ പ്രതിനിധീകരിച്ച് വത്തിക്കാനില് എത്തിയത്. എംഎല്എമാര് ഉള്പ്പെടെയുള്ള മലയാളി പ്രതിനിധി സംഘവും വത്തിക്കാനില് എത്തിയിട്ടുണ്ട്.
