തൃശൂര്‍: തൃശൂര്‍ മണ്ണുത്തിയില്‍ റോഡില്‍ കുടുങ്ങിയ പൂച്ചയെ രക്ഷിക്കാനായി ബൈക്ക് നിര്‍ത്തി റോഡിലേക്ക് ഇറങ്ങിയ യുവാവ് ലോറിയിടിച്ച് മരിച്ചു. കാളത്തോട് ചിറ്റിലപ്പള്ളി സ്വദേശി സിജോ (42) ആണ് മരിച്ചത്.
ചൊവ്വാഴ്ച രാത്രി 9.30ന് ആയിരുന്നു സംഭവം. സിജോ ബൈക്കില്‍ വീട്ടിലേക്ക് പോവുന്നതിനിടെ റോഡിലൊരു പൂച്ച കിടക്കുന്നത് കാണുകയും അതിനെ രക്ഷിക്കാന്‍ റോഡിലേക്ക് ഇറങ്ങുകയുമായിരുന്നു.
ഈ സമയം എതിര്‍ദിശയില്‍നിന്നു വന്ന ലോറി യുവാവിനെ ഇടിക്കുകയും തുടര്‍ന്ന് മറുവശത്തുകൂടി വന്ന കാറിനു മുന്നിലേക്ക് വീഴുകയും ചെയ്തു. യുവാവിനെ ഇടിച്ച് കാറും മുന്നോട്ടുനീങ്ങി. അപകടം കണ്ട നാട്ടുകാര്‍ ഉടന്‍ തൃശൂരിലുള്ള സ്വകാര്യ ആശുപത്രിയില്‍ എത്തിച്ചെങ്കിലും സിജോയെ രക്ഷിക്കാനായില്ല.
യുവാവിനെ ഇടിച്ചിട്ട ശേഷം ലോറി നിര്‍ത്താതെ പോവുകയായിരുന്നു. പൊലീസ് അന്വേഷണം ആരംഭിച്ചു.
