രാജ്ഭവനിലേക്ക് എസ്എഫ്ഐ പ്രവര്ത്തകര് നടത്തിയ മാര്ച്ചില് സംഘര്ഷം. ‘സംഘി വിസി അറബിക്കടലില്’ എന്ന ബാനറും ഉയര്ത്തിയാണ് പ്രവര്ത്തകര് മാര്ച്ച് നടത്തിയത്. പോലീസ് തടഞ്ഞതോടെ പ്രവര്ത്തകര് അക്രമാസക്തരാവുകയായിരുന്നു. പിന്നാലെ പോലീസ് പ്രവര്ത്തകര്ക്കുനേരെ ജലപീരങ്കി പ്രയോഗിച്ചു.
എസ്എഫ്ഐ സംസ്ഥാന കമ്മിറ്റിയുടെ നേതൃത്വത്തിലാണ് പ്രതിഷേധ മാര്ച്ച് നടത്തിയത്. വഴിതടയുന്നതിനായി പോലീസ് സ്ഥാപിച്ചിരുന്ന ബാരിക്കേഡുകള് മറിച്ചിട്ട് അതിന് മുകളില് കയറിനിന്നും പ്രവര്ത്തകര് മുദ്രാവാക്യം വിളിച്ചു. ആറുതവണയാണ് പോലീസ് ജലപീരങ്കി പ്രയോഗിച്ചത്. സംഭരിച്ച വെള്ളം തീര്ന്നതോടെ പോലീസ് പ്രതിരോധത്തിലായി.പ്രവർത്തകർ രാജ്ഭവനിലേക്ക് അതിക്രമിച്ച് കയറാന് ശ്രമിച്ചതോടെ പോലീസ് ടിയര് ഗ്യാസ് പ്രയോഗിക്കുമെന്ന മുന്നറിയിപ്പ് നല്കി. എന്നാല് പ്രവര്ത്തകര് ഇപ്പോഴും സ്ഥലംവിട്ടുപോകാന് തയ്യാറായിട്ടില്ല. സ്ഥലത്ത് ഇപ്പോഴും സംഘര്ഷാവസ്ഥ തുടരുകയാണ്.
