പട്‌ന: വരാനിരിക്കുന്ന ബീഹാര്‍ നിയമസഭാ തെരഞ്ഞെടുപ്പില്‍ ഒറ്റക്ക് മത്സരിക്കാനൊരുങ്ങി രാഷ്ട്രീയ ലോക് ജനശക്തി പാര്‍ട്ടി (ആര്‍എല്‍ജെപി). 2014 മുതല്‍ എന്‍ഡിഎയുടെ ഭാഗമായിരുന്ന താന്‍ എന്‍ഡിഎയുമായും ബിജെപിയുമായുമുള്ള എല്ലാ ബന്ധങ്ങളും വേര്‍പ്പെടുത്തിയതായി പാര്‍ട്ടി അധ്യക്ഷനും മുന്‍ കേന്ദ്ര മന്ത്രിയുമായ പശുപതി കുമാര്‍ പറാസ് അറിയിച്ചു. പട്‌നയില്‍ അംബേദ്ക്കര്‍ ജയന്തി ആഘോഷങ്ങള്‍ക്കിടയിലാടിയിരുന്നു പറാസിന്റെ പ്രഖ്യാപനം.
‘എന്‍ഡിഎയുമായും ബിജെപിയുമായുമുള്ള എല്ലാ ബന്ധങ്ങളും വേര്‍പ്പെടുത്തിയ ആര്‍എല്‍ജെപി വരാനിരിക്കുന്ന തെരഞ്ഞെടുപ്പിനെ ഒറ്റക്ക് നേരിടും. സംസ്ഥാനത്തെ 243 സീറ്റുകളിലും പാര്‍ട്ടി മത്സരിക്കും’ -പറാസ് പറഞ്ഞു. നിതീഷ് കുമാര്‍ സര്‍ക്കാരിനെ ജനങ്ങള്‍ക്ക് മടുത്ത് തുടങ്ങിയെന്നും വരും തെരഞ്ഞെടുപ്പില്‍ ആര്‍എല്‍ജെപി ബീഹാര്‍ രാഷ്ട്രീയത്തിലെ പ്രധാന ശക്തികളാവുമെന്നു അദ്ദേഹം കൂട്ടിച്ചേര്‍ത്തു.
