ആലപ്പുഴ: നവകേരള യാത്രക്കിടയില് പ്രതിഷേധിച്ച യൂത്ത് കോണ്ഗ്രസ് – കെഎസ്യു പ്രവര്ത്തകരെ മുഖ്യമന്ത്രിയുടെ ഗണ്മാന്മാര് ഉള്പ്പെടെയുള്ള സുരക്ഷാ ഉദ്യോഗസ്ഥര് മര്ദിച്ച കേസില് അന്വേഷണം അന്നത്തെ ക്രമസമാധാന ചുമതലയുണ്ടായിരുന്ന എഡിജിപി എം.ആര് അജിത് കുമാറിന്റെ ഓഫീസിലേക്ക് നീളുന്നു. ഗണ്മാന്മാരെ സംരക്ഷിക്കുന്നതിനായി കേസ് ഡയറി ഉള്പ്പെടെ തിരുത്തിയെന്ന നിര്ണായക കണ്ടെത്തലിന് പിന്നാലെയാണ് അന്വേഷണം ഉന്നത ഉദ്യോഗസ്ഥരിലേക്ക് എത്തുന്നത്.
കേസ് അട്ടിമറിക്കാനും പ്രതികളെ സംരക്ഷിക്കാനും ബോധപൂര്വമായ ശ്രമം നടന്നതായി പ്രത്യേക അന്വേഷണ സംഘം കണ്ടെത്തിയിട്ടുണ്ട്. ഇതിനായി എം.ആര് അജിത് കുമാറിന്റെ ഓഫീസില് വെച്ചാണ് കേസ് ഫയലുകള് മാറ്റിയെഴുതിയതും വ്യാജ രേഖകള് ചമച്ചതും. സംഭവത്തില് പ്രതികളായ സുരക്ഷാ ഉദ്യോഗസ്ഥരെ ആലപ്പുഴയിലേക്ക് വിളിച്ചുവരുത്തി ചോദ്യം ചെയ്യാനുള്ള നീക്കവും, കേസിന്റെ തെളിവ് ശേഖരണവും എഡിജിപി തടസപ്പെടുത്തിയിരുന്നു എന്നാണ് പുറത്തുവരുന്ന വിവരം.
