പാകിസ്ഥാന്‍ നടന്‍ ഫവാദ് ഖാന്‍ അഭിനയിച്ച ‘അബിര്‍ ഗുലാല്‍’ എന്ന ബോളിവുഡ് ചിത്രത്തിന്റെ ഇന്ത്യന്‍ റിലീസ് തടഞ്ഞു. കേന്ദ്ര വാര്‍ത്താ വിതരണ പ്രക്ഷേപണ മന്ത്രാലയ വൃത്തങ്ങള്‍ ആണ് ഇക്കാര്യം അറിയിച്ചിരിക്കുന്നത്. പഹല്‍ഗാം ഭീകരാക്രമണത്തില്‍ രാജ്യവ്യാപകമായി പ്രതിഷേധം ഉയര്‍ന്ന സാഹചര്യത്തിലാണ് ഈ തീരുമാനം.
ഫവാദ് ഖാനും വാണി കപൂറും കേന്ദ്ര കഥാപാത്രങ്ങളായെത്തുന്ന ചിത്രം മെയ് 9ന് തിയേറ്ററുകളില്‍ റിലീസ് ചെയ്യാനാണ് തീരുമാനിച്ചത്. വിവേക് ബി അഗര്‍വാള്‍ നിര്‍മ്മിച്ച് ആരതി എസ് ബാഗ്ദി സംവിധാനം ചെയ്ത ‘അബിര്‍ ഗുലാല്‍’ ഈ മാസം ആദ്യം രാജ് താക്കറെയുടെ നേതൃത്വത്തിലുള്ള മഹാരാഷ്ട്ര നവനിര്‍മ്മാണ്‍ സേന ഇന്ത്യയില്‍ റിലീസ് ചെയ്യുന്നതിനെ എതിര്‍ത്തിരുന്നു. ന്യൂഡല്‍ഹിയും ഇസ്ലാമാബാദും തമ്മിലുള്ള മോശം ബന്ധം ചൂണ്ടിക്കാട്ടിയാണ് ഫവാദ് ഖാന്‍ അഭിനയിച്ച സിനിമയ്ക്കെതിരായ എതിര്‍പ്പ് കൂടുതല്‍ ശക്തമായത്.
പഹല്‍ഗാം ഭീകരാക്രമണത്തിന് ശേഷം നിരവധി സിനിമാ തിയേറ്ററുകള്‍ ചിത്രം പ്രദര്‍ശിപ്പിക്കാന്‍ തയ്യാറായില്ലെന്നും നിരവധി വിനോദ സംഘടനകള്‍ ചിത്രം ബഹിഷ്‌കരിക്കണമെന്ന് ആവശ്യപ്പെട്ടിരുന്നുവെന്നും വാര്‍ത്താ വിതരണ പ്രക്ഷേപണ മന്ത്രാലയ വൃത്തങ്ങള്‍ അറിയിച്ചു.
