ആയിരം കോടി കളക്ഷൻ എന്ന റെക്കോർഡ് നേട്ടത്തിലെത്തി രാജമൗലി ചിത്രം ആർ.ആർ.ആർ. ആയിരം കോടി നേട്ടത്തിന്റെ ആഘോഷച്ചടങ്ങിന്റെ വീഡിയോ സമൂഹമാധ്യമങ്ങളിൽ വൈറലായിക്കൊണ്ടിരിക്കുകയാണ്.ചിത്രത്തിന്റെ നേട്ടത്തിൽ മുംബൈയിൽ വച്ച് നടന്ന ആഘോഷത്തിൽ അതിഥിയായി ബോളിവുഡ് താരം ആമിർഖാനും എത്തിയിരുന്നു. ചടങ്ങിൽ ജോണി ലെവെർ, മകരന്ദ് ദേശ്പാണ്ഡേ, നടി ഹുമാ ഖുറേഷി എന്നിവരും ആഘോഷത്തിൽ പങ്കുചേർന്നു. ആഘോഷത്തോടനുബന്ധിച്ച് തയ്യാറാക്കിയ റെഡ് കാർപ്പറ്റിലേക്ക് കറുത്ത വസ്ത്രത്തിലാണ് എൻ.ടി.ആർ എത്തിയത് ശബരിമല വ്രതത്തിലായതിനാൽ കറുപ്പ് കുർത്തിയും പൈജാമയുമായിരുന്നു രാം ചരണിന്റെ വേഷം. ചെരുപ്പിടാതെ കയ്യിലൊരു തോർത്തുമായി എത്തിയ താരത്തിന്റെ ലുക്ക് വലിയ ശ്രദ്ധ നേടുകയാണ്. എല്ലാ വര്ഷവും വ്രതം അനുഷ്ഠിക്കാറുണ്ട് രാംചരണ്. രാം ചരണും പിതാവും നടനുമായ ചിരഞ്ജീവിയും വർഷങ്ങളായി ശബരിമലയില് ദർശനം നടത്താറുണ്ട്.
മാർച്ച് 25നാണ് ആർആർആർ പ്രേക്ഷകർക്ക് മുന്നിലെത്തിയത്. ജനുവരി 7ന് ആഗോളതലത്തില് തിയറ്ററുകളിലെത്താനിരുന്ന ചിത്രമാണ് ‘ആർആർആർ’. എന്നാൽ ഒമിക്രോണ് കേസുകള് വര്ധിക്കുന്നതിനനുസരിച്ച് പല സംസ്ഥാനങ്ങളും സാമൂഹികജീവിതത്തില് കര്ശന നിയന്ത്രണങ്ങള് നടപ്പാക്കിയതോടെ തീരുമാനം മാറ്റുക ആയിരുന്നു.
