ചലച്ചിത്ര നിർമാതാവും സംവിധായികയുമായ ഏക്താ കപൂറിനെതിരെ കോടതിയുടെ അറസ്റ്റ് വാറണ്ട്. ഏക്തയുടെ പുതിയ വെബ് സീരീസായ ട്രിപ്പിൾ എക്സ്: സീസൺ ടുവിൽ സൈനികരെ അധിക്ഷേപിക്കുകയും അവരുടെ കുടുംബാംഗങ്ങളുടെ വികാരം വ്രണപ്പെടുത്തുകയും ചെയ്തെന്ന പരാതിയെ തുടർന്നാണ് നടപടി.അമ്മ ശോഭ കപൂറിനെതിരേയും അറസ്റ്റ് വാറണ്ട് പുറപ്പെടുവിച്ചിട്ടുണ്ട്.’ XXX ‘ സീസൺ – 2 എന്ന വെബ് സീരീസിൽ സൈനികരെ അധിക്ഷേപിക്കുകയും കുടുംബാംഗങ്ങളുടെ വികാരം വ്രണപ്പെടുത്തുകയും ചെയ്തു എന്നായിരുന്നു വിരമിച്ച സൈനികനായ ശംഭു കുമാർ പരാതി നൽകിയത്.2020 ലാണ് കേസിനാസ്പദമായ പരാതി ഫയൽ ചെയ്യപ്പെടുന്നത്. സൈനികന്റെ ഭാര്യയുമായി ബന്ധപ്പെട്ട് നിരവധി അപകീർത്തികരമായ ദൃശ്യങ്ങളുണ്ടെന്നാണ് ശംഭുകുമാറിന്റെ വാദം.കോടതിക്ക് മുമ്പാകെ ഹാജരാകണമെന്നാവശ്യപ്പെട്ട് ഏക്തയ്ക്കും ശോഭയ്ക്കും കോടതി സമൻസ് അയച്ചിരുന്നു. സീരീസിലെ വിവാദമായ ചിലരംഗങ്ങൾ ഒഴിവാക്കിയിട്ടുണ്ടെന്ന് ഇതിന് മറുപടിയായി കോടതിയെ അറിയിച്ചതല്ലാതെ ഇരുവരും നേരിൽ ഹാജരായിട്ടില്ല.കോടതിയിൽ ഹാജരാകാതിരുന്നതിനെ തുടർന്നാണ് ഇപ്പോൾ അറസ്റ്റ് വാറണ്ട് പുറപ്പെടിവിച്ചത്. കപൂറിന്റെ ഉടമസ്ഥതയിലുള്ള ഒടിടി പ്ലാറ്റ്ഫോമായ ബാലാജി ഫിലിംസിലാണ് സീരീസ് സംപ്രേഷണം ചെയ്തത്.ശോഭ കപൂറും ബാലാജി ടെലിഫിലിംസിന്റെ സഹ ഉടമസ്ഥയാണ്.
