തിരുവനന്തപുരം: മാസപ്പടി കേസില്‍ എസ്എഫ്‌ഐഒ പിടിച്ചെടുത്ത രേഖകള്‍ ഇഡിക്ക് ഉടന്‍ കൈമാറില്ല. ഇരുപത്തി അയ്യായിരത്തിലധികം പേജുകള്‍ അനുബന്ധ രേഖകളായി ഉണ്ടെന്നും ഉടന്‍ കൈമാറാന്‍ ബുദ്ധിമുട്ടാണെന്നും വിചാരണ കോടതി ഇഡിയെ അറിയിച്ചു.
മാസപ്പടി കേസില്‍ എസ്എഫ്‌ഐഒ കുറ്റപത്രത്തിന്റെ പകര്‍പ്പ് കോടതി ഇഡിക്ക് കൈമാറിയിരുന്നു. സര്‍ട്ടിഫൈഡ് പകര്‍പ്പ് ആണ് എറണാകുളം ജില്ലാ അഡീഷനല്‍ സെഷന്‍സ് കോടതി ഇഡിക്ക് കൈമാറിയത്.ഒരു വര്‍ഷം നീണ്ടുനിന്ന അന്വേഷണത്തിനൊടുവിലാണ് എസ്എഫ്‌ഐഒ കുറ്റപത്രം സമര്‍പ്പിച്ചത്. കമ്പനികാര്യ വകുപ്പിലെ 144, 145, 447 അടക്കമുള്ള വകുപ്പുകള്‍ ചുമത്തിയായിരുന്നു കുറ്റപത്രം സമര്‍പ്പിച്ചിരുന്നത്. ഈ വകുപ്പുകള്‍ പ്രകാരമുള്ള കുറ്റങ്ങള്‍ നിലനില്‍ക്കുമെന്ന് കഴിഞ്ഞദിവസം ജില്ലാ അഡീഷനല്‍ സെഷന്‍സ് കോടതി അംഗീകരിക്കുകയും കുറ്റപത്രം ഫയലില്‍ സ്വീകരിക്കുകയും ചെയ്തിരുന്നു.
ഇതിനു പിന്നാലെയാണ് കുറ്റപത്രത്തിന്റെ പകര്‍പ്പ് ആവശ്യപ്പെട്ട് ഇഡി കോടതിയില്‍ അപേക്ഷ നല്‍കിയത്. ഈ അപേക്ഷ പരിഗണിച്ചാണ് കോടതി കുറ്റപത്രത്തിന്റെ സര്‍ട്ടിഫൈഡ് കോപ്പി ഇഡിയുടെ അഭിഭാഷകന് നല്‍കിയത്. മുഖ്യമന്ത്രിയുടെ മകള്‍ വീണ കേസില്‍ 11-ാം പ്രതിയാണ്.
