സംസ്ഥാനത്ത് വിനോദ സഞ്ചാര വകുപ്പിന് കീഴിലുള്ള സഞ്ചാര കേന്ദ്രങ്ങളില് മുതിര്ന്ന പൗരന്മാര്ക്ക് 50 ശതമാനം ഫീസ് ഇളവ് അനുവദിക്കാന് തീരുമാനിച്ചതായി ടൂറിസം മന്ത്രി പി എ മുഹമ്മദ് റിയാസ് അറിയിച്ചു. വിനോദ സഞ്ചാര കേന്ദ്രങ്ങളില് എത്തുന്ന മുതിര്ന്ന പൗരന്മാര്ക്ക് ഇത് വലിയ ആശ്വാസമാകുമെന്നും മന്ത്രി പറഞ്ഞു.
വിനോദസഞ്ചാര കേന്ദ്രങ്ങളില് മുതിര്ന്ന പൗരന്മാര്ക്ക് ഇളവുകള് അനുവദിക്കണമെന്ന് മുതിര്ന്നപൗരന്മാരും അവരുടെ ക്ഷേമത്തിനായി പ്രവര്ത്തിക്കുന്ന സംഘടനകളുമടക്കം നേരത്തെ സര്ക്കാരിനോട് ആവശ്യപ്പെട്ടിരുന്നു. നിയമസഭയുടെ കീഴിലുള്ള മുതിര്ന്ന പൗരന്മാരുടെ ക്ഷേമം സംബന്ധിച്ച സമിതിക്ക് മുന്പില് കോഴിക്കോട് ഹ്യൂമന് റൈറ്റ്സ് ഫോറം സമര്പ്പിച്ച ഹര്ജിയിലും ഇതേ ആവശ്യം ഉന്നയിച്ചിരുന്നു.
വിനോദസഞ്ചാര വകുപ്പ് ഇക്കാര്യം പരിശോധിച്ച് വിശദമായ റിപ്പോര്ട്ട് തയ്യാറാക്കി. നിയമസഭാ സമിതിയുടെ മുന്പാകെയും റിപ്പോര്ട്ട് സമര്പ്പിച്ചു. വിശദമായ പരിശോധനകള്ക്ക് ശേഷമാണ് 50 ശതമാനം ഫീസ് ഇളവ് നല്കാന് വകുപ്പ് തീരുമാനിച്ചതെന്നും മന്ത്രി വ്യക്തമാക്കി.
