കായംകുളത്ത് പെട്രോള്‍ പമ്പില്‍ ഗുണ്ടാ അക്രമം. പമ്പിലെ രണ്ട് ജീവനക്കാര്‍ക്ക് ആക്രമണത്തില്‍ പരുക്കേറ്റു. കായംകുളം പുത്തന്റോഡ് ജംഗ്ഷനിലെ ടി എ പെട്രോള്‍ പമ്പിലാണ് സംഭവം ഉണ്ടായത്. രാത്രി ഒരു മണിയോടെ എത്തിയ ഒരുകൂട്ടം യുവാക്കള്‍ 50 രൂപക്ക് പെട്രോള്‍ ചോദിച്ചു. പെട്രോള്‍ അടിച്ച ശേഷം പണമില്ലെന്നു പറഞ്ഞു. പിന്നാലെ ജീവനക്കാരുമായി തര്‍ക്കം ഉണ്ടാകുകയും മര്‍ദിക്കുകയുമായിരുന്നു എന്നാണ് മര്‍ദ്ദനമേറ്റ ജീവനക്കാരില്‍ ഒരാളായ ഉണ്ണികൃഷ്ണന്‍ പറയുന്നത്.
ലഹരിക്ക് അടിമ യായ ആളുകളാണ് അക്രമം നടത്തിയതെന്നു പമ്പ് ഉടമയും വ്യാപാരി വ്യവസായി ഏകോപന സമിതി സംസ്ഥാന വൈസ് പ്രസിഡന്റുമായ എ ജെ ഷാജഹാന്‍ പറഞ്ഞു. പലപ്പോഴും ഇത്തരത്തില്‍ പമ്പില്‍ ഗുണ്ടകളുടെ ഭീഷണി ഉണ്ടായിട്ടുണ്ടെന്ന് ജീവനക്കാര്‍ പറയുന്നു. സംഭവത്തില്‍ കായംകുളം പോലീസ് അന്വേഷണം ആരംഭിച്ചു.
