അന്തരിച്ച നടൻ സജീദ് പട്ടാളത്തെ ഓർമിച്ച് സംവിധായകൻ തരുൺ മൂർത്തി. നിങ്ങൾ മുത്താണെന്നും ബാക്കി നമ്മുടെ സിനിമ സംസാരിക്കുമെന്നും അദ്ദേഹം ഫെയ്സ്ബുക്കിൽ കുറിച്ചു.തരുൺ മൂർത്തിയുടെ സൗദി വെള്ളക്കയിലാണ് സജീദ് അവസാനമായി അഭിനയിച്ചത്.വേഷം ഇട്ടുവന്നപ്പോൾ ഡയറക്ടര് സര് അങ്ങ് അഴിഞ്ഞാടിക്കൊള്ളാൻ പറഞ്ഞു. കണ്ണുംപൂട്ടി അങ്ങ് ചെയ്തു. കൂടെ ഉണ്ടാകണം എന്ന സജീദിന്റെ വാക്കുകൾക്കൊപ്പമാണ് തരുൺ മൂര്ത്തിയുടെ പോസ്റ്റ്.
പ്രിയപ്പെട്ട സജീദ് ഇക്ക.. നിങ്ങൾ മുത്താണ്… ബാക്കി നമ്മുടെ സിനിമ സംസാരിക്കും. സ്വർഗത്തിൽ ഇരുന്ന് നിങ്ങൾ ആ കൈ അടികൾ കാണണം. കേൾക്കണം..!! അത്ര മാത്രം പറഞ്ഞു നിർത്തട്ടെ. നെഞ്ചിലെ ഭാരം കൂടുകയാണ്. തരുൺ മൂർത്തി കുറിച്ചു.
കഴിഞ്ഞദിവസമാണ് കൊച്ചിയിൽ നടൻ സജീദ് പട്ടാളം അന്തരിച്ചത്. ഫോർട്ട് കൊച്ചിയിലെ പട്ടാളമെന്ന സ്ഥലപ്പേര് പേരിനോട് കൂട്ടിച്ചേർത്താണ് സജീദ് പട്ടാളം എന്ന പേര് സ്വീകരിച്ചത്. വെബ്സീരീസുകളിലൂടെയാണ് സജീബ് അഭിനയം ആരംഭിക്കുന്നത്. അഭിനേതാവും ഫോട്ടോഗ്രാഫറുമായ ഷാനി ഷാക്കി വഴി സംവിധായകൻ മൃദുൽ നായരിലേക്കും അതുവഴി വെബ് സീരീസുകളിലേക്കും എത്തി. തുടർന്നാണ് സജീദ് സിനിമാഭിനയം ആരംഭിക്കുന്നത്.ജാനെമൻ, കനകം കാമിനി കലഹം, കള തുടങ്ങിയ ചിത്രങ്ങളിൽ അഭിനയിച്ചു.